7 Taong Gulang, at 143 na Positibo sa HIV sa South Cotabato

Isang pitong taong gulang na bata ang naitala bilang pinakabatang kaso ng Human Immunodeficiency Virus (HIV) sa South Cotabato, ayon sa Integrated Provincial Health Office (IPHO), kasabay ng patuloy na pagtaas ng bilang ng mga bagong impeksyon sa lalawigan mula Enero hanggang Setyembre 2025. Kinumpirma ng hepe ng Disease Prevention and Control Unit na ang kaso ay hindi mula sa ina, kundi resulta umano ng sexual transmission na may kaugnayan sa pang-aabuso isang pangyayaring nagbunsod ng mas pinaigting na panawagan sa mga magulang at komunidad na bantayan at protektahan ang mga bata laban sa karahasan at sakit.

VIEW PICTURE

The official Facebook page of the Office of the Provincial Health Officer (OPHO) of South Cotabato. VIEW PICTURE

SOUTH COTABATO, Philippines — Isang 7-taong gulang na bata ang naitalang may pinakabatang kaso ng Human Immunodeficiency Virus (HIV) infection sa lalawigan ng South Cotabato, ayon sa Integrated Provincial Health Office (IPHO).

IBA PANG MGA ARTIKULO:

Kinumpirma ito ni Nurse III John Arlo M. Codilla, hepe ng Disease Prevention and Control Unit ng IPHO South Cotabato, na nagsabing natuklasan ang kaso sa gitna ng tumataas na bilang ng mga bagong impeksyon sa lalawigan.

Batay sa pinakahuling datos ng IPHO mula Enero hanggang Setyembre 2025, may kabuuang 142 na kaso ng HIV infection ang naitala sa South Cotabato. Sa bilang na ito, 143 ang kalalakihan at 8 naman ang kababaihan. Kapansin-pansin na sa walong babae, apat dito ay buntis na positibo sa HIV.

Gayunpaman, nilinaw ni Codilla na ang kaso ng 7-taong gulang na bata ay hindi dulot ng “mother-to-child transmission” o pagpasa ng virus mula sa ina papunta sa anak habang nagbubuntis o nanganganak.

“Ito ay hindi galing sa ina. Base sa ating imbestigasyon, ang naging sanhi ng pagkahawa ng bata ay sexual transmission at may kaakibat itong sexual abuse,” pahayag ni Codilla. Hindi na nagbigay ng karagdagang detalye ang opisyal upang maprotektahan ang pagkakakilanlan at kalagayan ng biktima.

Dahil dito, nagbigay ng mahigpit na paalala ang IPHO sa lahat ng mga magulang at tagapag-alaga na maging mapagmatyag at palaging bantayan ang mga bata.

“Lagi po nating bantayan ang ating mga anak. Palagi po nating paliguan ng mabuti ang mga genitalia at obserbahan kung may mga senyales ng pang-aabuso. Turuan din po natin silang protektahan ang kanilang sarili,” ani Codilla. Hinimok din niya ang publiko na huwag mag-atubiling magpa-checkup at magpasuri upang agad na matukoy ang sakit.

“Maging vigilant po tayo. Ang HIV ay maaaring walang sintomas sa simula, kaya mahalaga ang regular na testing lalo na kung may hinala ng exposure,” dagdag pa ng opisyal.

Ang nasabing datos ay nagsisilbing panawagan sa mas pinaigting na kampanya laban sa HIV/AIDS at child abuse sa probinsya.

Leave a Reply Cancel reply